Na kay zi bı hakana yena kaykerdenı. Şêlıgê dewê yan zi ê mahlayê soz danê pê u cayê dı komê pêser benê u yenê pêser. Nê hendê herunêda şıqê yan zi cılê ca kenê pak u duz. Hergı jew beno cayêdê ê cay dı hakê xo ronano. Ronay tepey a ê kı kaykenê u şêlıgo bino wınyayoği (temaşekerdoğ) çorşmey nê hakan kom benê. Eger mêşa siya biro hakdê kê ya anışo, kaykerdoğê (kaywanê) ê haki ê hakê binê kı qandê kaykerdenı o ca dı roneyayê ê hemını gêno. (Yanê ê hakan hemını weno, qezenc keno). Wext beno şeşti-heştay hak o cado duz dı qandê kaykerdenı roneyêno. Wexto kı mêşa siya yena ê hakan sera vızı-vızı kena u perena, zeriya ninan küt-küt erzena, ka do ê kê ya anışo. Tabi mêşi zi şeytaniyê. Wexto kı nê hakan sera perenê, fınê çorşmey ney, fınê ey geyrenê u heyecan danê kaykerdoğan. Wext beno seatê miyan dı zi mêşê nina u pa niyanışena. Tay çorşman ra mêşan fetılnenê u hetê cadê kaya anê kı, hakêna anışo.
Ê mêşê siyayê kı zeriya kesi cı ra qelıbêna, qandê a kay benê melekê qezenckerdenı, rısk akerdenı u şans ardenı.
Wexto kı mêşi birê jew yan zi çend hakana anışê, ê xo miyan dı ê hakanê binan pê ra bara kenê.
Qandê kı mêşı yena hakana anışena, namey na kay zi biyo Hakmêş.
Tabi zey kayandê binan na kay dı zi hile u xürde esto u beno. Tay verê amyayenı qırtıkê Rıb yan zi qırtêkê çiyo şirane (mesela zey hıngımên, riçal, şeker u herwına) sawenê cayêdê hakdê xo kı mêşı biro u hakdê ey a anışo. Tabi ê kı hekem weçineyayê ê verê kaykerdenı, hakan jew bı jew kontrol kenê u hewna ronanê.
