Veri welatê ma dı, roşanan dı, şên u şahiyan dı, rojandê amnaniyê vengan dı, rojandê tahtilan dı hêlıki vıraziyayê, keyney, qeç u xorti nıştê cı, kêf u kay kerdê u wextê xo pa ravêrnayê.
a) Hêlıkı ju qandê tut u pıtan, zeredê banan dı, gema dar u beri bın dı, wextê pali u karê amnaniyê gemı kerdenı, gema cayandê honık u awan sero vırazenê. Na hêlıkı en bolki qandê hewnakerdenda tut u pıtan, vındanayenı u heweynayenda inan vırazênê. Wexto kı tut yan pıtı bermena, kenê nê hêlıkan, hêlkenê u danê vındanayenı. Hêlıkı u hêlkerdena cı bol weşdê qeçkan, tut u pıtan şına.
b) Ê dıdını gılandê darandê berzana vıradayenı u dardakerdenda reseniya vırazênê, xort u keyney nışenê u xo pa hêlkenê. Nıka heruna hêlıkandê tut u pıtan, hêlıkanê modernan, beşig u qaryolayanê werdêkan gıroto. Heruna hêlıkandê darana vıraştenı zi leyliyan, hêlıkanê seyar u modernan gıroto.
Hêlıkê serdê daran bı no hesaba vıraziyayê: Jewi serêdê reseni gırotê u vıziyayê darê ser u o serê reseni gılêdê cıra vıradayê cêr. Cayo kı resen vıradayê vanê gıreyê yan zi wıjara gılna abırıyayê kı, cordê ey ra vıradayê kı, nêxijıkıyayê u vera cêr, vera kokdê darı niyameyê u sıst nêbiyayê. Serê reseniyo bin zi cêr dı jewi tepıştê. O sereyo corên vırada cêr tepeya, ê cêri serê ê resendê cori tepıştê u vera cêr antê u wırna serey resnayê pê u kerdê zey pê derg u ê serey pêya gırêdayê. Textê do herayo kılm yan zi minderê ardê mabêndê wırna serandê reseni dı, zey zindê estora yan zi herekiya vıraştê u jew sero ronıştê. Wexto kı jew sero ronıştê ê binan ra zi jewi o hêlkerdê. Nobeta cınıştenıda ey biyê temam tepeya, o ameyê war jewna şiyê nıştê cı u jewnay o hêlkerdê. tay-taynan zi xo bı xo, xo bı lıngandê xo ya yan zi bı bedendê xo ya xo hêlkerdê.
Tay wırna lıngandê xo ya vıziyayê nabêndê wırna serandê reseni ser u bı lıng u çogandê xo ya xo hêlkerdê. Wext biyê şewra ra heta şan qeç u qul, xort u keyney keyandê xo nêşiyê u nıştê nê hêlıkan. Ewro mabêndê banan dı, parqandê qeçkanê kaykerdenı dı hêlıkê moderni kışta Belediyan, yan zi ê kı o mıntiqadı roşenê kışta inan ra ameyê vıraştenı u qeçeki nışenê cı.
