Na kay en bol ki zımıstani wedan dı, key dost u enbazan dı, kışta xort u resayana bı hakana yena kaykerdenı. Ê kı wazenê kay kerê hergı jew cemê, celebê haki keno selê yan zi çiyê miyan u şıno cadê kay. Tabi nê veri pê haydar kenê kı fılan rojı yan zi fılan seatı dı u fılan cadı na kay kaykerê.
Labırê vanê kes weş bısınasno u bızano kı kamcin hak metino u rew rewi nêşıkyêno, ê haki hakan miyan ra weçino u biro pa kay kay bıkero. Şêlıgi hakê xo gıroti, amey u arêbıyay tepey a dest bı kayda (Kaykerdenda) hakçıqı kenê. Na kay mabêndê dı merdım u dı hakan dı kay bena. (Hakê ninan ju ju fını xaşênayey, ju ju fını xaxi benê. Wexto kı xaşênayey benê, vanê ê hemını xaşênayey bê, wexto kı xaxi benê vanê ê hemını xaxi bê) Ê şêlıgi ra jew zi mabêndê ninan dı ze hekem weçineyêno u o kay dano idarekerdenı. Hekem weçineyêno kı kes kesi rê, hile, dalavêre, neheqey nêkero yan zi nêbo. Qandê kı tay çımakerdey u şeytani estê kı serê hakdê xo nêdanê serdê hakdê ê bini ro. Danê kışt u kalekan ro kı, hakê ê bini rew bışıkiyo. Şıma zanê kışt u kaleki hendê ser u bıni bıqüwet u metin niyê. Wexto kı ê kışt u kalekan ro do hak hıma şıkêno.
Bı no şekla na kay kaybena: Jew hakê xo, xo nuncıkı miyan dı seri ser yan zi bıni ser tepşeno. O bın zi hakê xo dano hakdê ney ro. Hakê kê bışıkiyo, o kı hakê cı nêşıkyayo o ê hakê şıkati gêno. Yanê hako kı nêşıkyayo wêrê ê haki qezenc keno. Bı no hesaba jewbini ra hakan wenê. Wexto kı kenê na kay kaybıkerê, verê coy bazareya xo kenê, ka do teniya seri ser yan zi bı bıniya zi kay kerê ya nêkerê. Eger teniya seri ser kaykerê, seran teniya danê pê ro. Ê kı şıkya o ey gêno.
Na kay zi bı nobeta, nobeta xo pawıtena kay bena. O kı ninan rê hekem weçineyayo, o verê kaykerdenı nê kaywanan keno rêz, fêno nobetı, ka kam do kami dımı u kê dı kaykero. O kı hakê cı şıkyêno, no fın o haknaya dano hakdê bini ro. Jew hak hetan kı nêşıkiyo kay miyan dı nino vırnayenı. Hetan kı o hak bışıkiyo vanê ê hakiya kaykero. Jew jew wext beno, jew merdım bı jew hakiya new-des haki weno. Çımkı tay haki estê qabıx u qalıkê cı zahf metiniyê u rew rewi nêşıkyênê. Metinbiyayena nê hakan zi, ê kı kaykenê ê bı dındanandê xo ya fahm kenê. Ser yan zi bınê (kışta seri, kışta qenı) haki danê dındandê xo yê çengedê cêriyê en vernıyêni ro, ka çend metino çend niyo fahm kenê. Wexto kı dı haki deyênê pê ro, o kı şıkêno ey ra çıqini vıjêna. Qandê coy zi namey na kay hakçıq neyayo pa. Şıma zanê namey kayandê ma heme namey ronışteyê u gorey a kay neyayê pa.
