Şıma zanê kınci zey tene, zerzewat u qezencandê binan, erdi miyan dı lemda xo sero nino arêkerdenı u rıjnayenı. Kınci ame wextê biyayenı tepeya, tewdê lemda cı ya erdi miyan dı qılayneyêno, werzaneyêno. Hera kı kok u riçandê cı ya werzena, erdi miyan dı wextê qılaynayenı dı yena roşanayenı u cı ra bena pak. Bahdê qılaynayenı u pak kerdenda kok u riçan, ê lemanê kınci gênê u anê erdo dawıte dı, banan sero, cadê cıwênano duz u dawıte dı, yan zi cılan sero zey koliyandê koziga şaneyênê pê ver qandê wışk biyayenı. Tiji vera bi wışk tepeya, ê kınci lem bı lem roşanenê. Dı a roşanayenı dı kınci cı rıjêno. Wexto kı roşanenê, serê cı kenê vera erd, kokê cı kenê berz u bı o hesaba roşanenê. Heme rıjna tepeya ey arêkenê pêser, pırojında qül werdına yan zi elega ey elegı kenê. Semedê eleg kerdenı qandê kı wexto kı rıjnenê perê ciyê wışki zi tey kewnê. Eleg yan zi pırozın kerdena inan pê ra abırnenê. Tabi nê kari zi wextê qılaynayenı ra heta roşanayenı heme dewı zi piya kenê. Yanê nê kar u bari zi qolektif kenê.