Dewandê ma dı veri hergı şewı şêlıg cayê dı yan zi keyeyê dı ameyê pêser u heta şewra xo rê kay u kêf kerdê u wextê xo pa ravêrnayê. Dı ê şew u ê kombiyayenan dı taynan xo rê müşewre (Niqaş, münaqaşa), taynan qeybet, taynan kay u taynan zi goştareya inan kerdê. Pêrê meseley, fıqrey, estanıki vatê u dêri kerdê. Nê pêser amyeyeni en bol ki demserdê zımıstani dı biyê. Çımkı o wextı kar u bar çınêbı kı mıletı bıkero u pa wextê xo ravêrno. Wextê kar u bar kerdenı dı herkes edızıyayê. Na edızyayenı ver, wexto kı şandı ameyê keye, nanê xo werdê nêwerdê cadê xo sero derg biyê. Hemını werdenı u şımıtena xo demserda amnan u payızi dı, qandê zımıstani kerdê zere u zımıstani vetê werdê.
Wexto kı meymanê jewi ameyê, a şewı ê dewıjê inan heme o keye dı kom biyê. Wexto kı jewi rê qeçek bıbıyayê, xeberêda xeyri cı rê biyameyê, yan zi ey bı xo çiyêdê xeyri bıkerdê fına heme dewıjê cı key ey dı ameyê pêser. Wexto kı jewi kerdê şıro cayê, yan zi wexto kı cayê ra peydı ameyê fına nê heme şiyê ey hetı. Dı a şiyayenı dı kêf u alemandê xo ra, werdenı u şımıtenda xo ra ca nêmendê. Dı nê şewan dı şami ameyê vıraştenı, şiraney ameyê werdenı u şımıtenı, çerez ameyê çerezkerdenı u herwına. Kıştê ra, yan zi gorey sukandê gırdan u welatandê ğeriban, kes şeno nê kombiyayenan rê vajo veyveyê do tam, ziyafetê do ercıyaye u kêfê do weş u festê do mükemelo. Festê kı sukandê gırdan dı vıraziyayê hendê nê şewan kêf u kêfweşey, şên u şênayey nêdanê kesi u rıhê kesi pa hendayê şa nêkerdê. Ê festê ê şewandê gırdan u welatandê ğeriban, nê şewandê ma hetı hiç mendê.
