Ma hetı bahdê biyayenda Engurda şirê şarê dewandê ma heme piya vıjêno kerge kerdenı. Dewızi şınê Rezan miyan dı cayê do duz u berz dı, yan zi deyeyê sero cay kergi vırazenê. Dewızi herzaley vırazenê, cay xo yê rakewtenı u bın dı sersi dı ronıştenı vırazenê. Lênanê xo yê kergi, fıraq-mıraqanê xo yê tey şami vıraştenı, werdenı, engurı çinayenı, cadê kergi ardenı u herwına cı rê çıçi lazım o benê cadê kergi. Bı tonana koli anê qandê gırênayenda kerge u Rıbi. Camêrd u xortê dewı heme wertiyê xo yê tey rakewtenı gênê u şınê kergan ser. Şewra rewê honık dı cıni, xort, keyney u qeçi şınê rezan miyan dı engurı çinenê. Camêrdi zi inan kenê selan u sandıqan miyan u anê cadê kergi. Rezê kı duriyê sandıqan barkenê bergir, Qatır u Heran u wıni anê. Rezê kı nezdiyê cadê kergiyê camêrdi sandıqan yan zi selan erzenê xo doşi u anê. Şewra ra heta nezdi dıhirı engurı çineyêna u kırêşêna kergi ser. Tay cıniyê bı emıri zi dewı dı manenê qandê şami vıraştenı. Dıhirê heme piya nanê xo yê dıhirı wenê.
Eger roj bol germ bo tay şınê daran bın dı sersida daran dı rakewnê. Taydê cı zi xo vıradanê roy (Fırat) ver yan zi cayo kı awi, doli tey estê ê cayan, kewnê awı u xo kenê honıki. Eger dınya bol germ nêbo, bahdê werdenda nandê dıhirı dina seati tepey a fına şınê rezan miyan dı engurı çinenê u anê. Engura kı çinaya u arda kergi ser, ay cayê dı sersiya dar u herzalan bın dı mühafaza kenê. Qandê kı tiji vera, roji vera wışkı nêbo u awa cı niyanciyo. Şıma zanê tijiya welatê ma, dı seatan miyan dı heki pêyşnena.
Şandê cı dı heme kergi sero resenê pê, kom benê. Tay engurı pay kenê, tay isot, bancani u çiyo zey inan erzenê adıri ser u adırdı sur kenê, tay lênanê rıbi nanê adıri ser u rıb gırênenê, tay pastêx, kesmey, sıncıxi u herwına vırazenê. Çend seati şanê ser gırweyay tepey a yenê roşenê. Ê kı dewda cı dı aşıqi estê, aşıqê cı yenê cı rê saz, luli yan zi nıqara u zırna cınenê u nê zi vero govendı gırêdanê u kay kenê. Ê kı vengê cı weşo u dêri zanê dêri kenê. Bı no hesab a heta nezdi zerq eştenı kêf u kay kenê. Tay dewê kı rezê cı boliyê, kergeyê ê dewanin di-rê heftey rameno. (Mesela veri kerge kerdena dewda ma nezdi mengê ramıtê). Bı no hesab a hergı şewı kêf u şahi kenê. Qandê coy ma wextê vıjyayenda kerge kerdenı rê vanê roşanê kerge kerdenı.
Not: kerge: Bizim memleketimizde şire üzümü olduktan sonra, onu basıp pekmez, pestil, kesme, helva vesaire yapmak için halkımız bağ bozumuna çıkar. Bu bizde en az iki üç hafta sürer. Biz bu bağ bozumuna kerge deriz.
