Kıtavê mıno newe “ANTOLOJİYÊ SAİRUNÊ DİNA” kıtavxanê BELGE (BELGE YAYINLARI) de veciya.

Dostê Delali....

Sıma be xo ki zonenê, domonêni u cêncênia ma de, zonê ma Zazaki de literaturê (edebiyatê) nusnaey çinê bi. Literaturê ma eve qesu bi. Şiirê qomê ma kılamu de bi. Ma literaturê dina zonunê sarê teveri de doz kerdene u wendêne. Her waxt jü mırode zerrê mı bi, mı wastêne ke literaturê dina bıçarnine Zazaki. Sairê dinaê ke her zon de waninê, ma ça Zazaki de mewaniyê? Mı ke ni şiiri her caê dina ra kerdi arê, ardi pêser, zono ke mı Dêkunê xo ra haleti gureta, çarnay o zon, mı rê heni ame ke dina Zazaki de qesey kena. Raştiye ke vacine, jê domonu bine sa. Jü ki nia vacine, zonê ma de hata nıka karo de nianên çinê bi, no kar u emego de nianen hona sıfteo.

Mı, no Antolojiyê xo sero hama, hama nêjdiye des serri guriyune. Gegane jü çarnaisê şiiri sero eve asmu vınetune. Serba jü çekuy, mı welat rê tel kerdene ra, khokımunê ma ra pers kerdene. Wastena mı, zono de naylon mebo, çiyo de hewl bêro werte. Sayırunê dina ra şiirê ke mı çarnê zonê ma, ni şiiri jê çarnais nê, sayıke Zazaki de nuşiyê, gunê qomê ma, cı ra hêni thom bıcêro, wendeğê ma kulturê sarunê binu nas kerê, xoriyên u şirêniya zonê ma bıvênê. Çıke jü zon kulturunê binu ra çıqa ke ame têri, nas bi, honde ki avêr sono!

İnson ke şiir sero guriya, şiir nusna, vineno ke şiir can u roê zonio. Şiir honde kultur u zon ra gıredaiyo ke, vanê, şiir nêçarnino. Raşti ke, mı ke dest kerd cı, na kıtavi sero guriyune, mı be xo ki no di, şiir nêçarnino, newede nuşino. Eke şiir çarniya, bıngê şiiri, vaten u wastena sairi gunê bêro ra zon. Hama no qese be qese nêbeno. Verê coy mane danino cı, jü ki kamci waxt de nuşiyo, kulturê o waxt çıturi biyo, sair ni çıturi ardê ra zon, ni pêro, zono ke çarniyo, gunê manê xo reyna o zon de bıveciyo. Çiyo ke mı cor de nusno, mı ni pêro pia çım ver de gureti. Çıqa ke destebera mı ra ame, vatena sairi, kultur u karekterê zonê ma de ni ardi têlewe.

Xıtamê peyeni de wazon taê çi sımarê vacine. Kıtavxanê BELGE de, hata nıka zonê ma Zazaki de kıtav nêveciyo, kıtavê mı, kıtavo sıfteo. Qedır gıran, nustoğ u siyasetkar, Ragıp Zarakolu, ma nêsıkıtime, Zazaki de dı elfabey qewıl kerdi. Elfaba Vate u elfaba ma C. M. Jacobsoni. Ragıp Zarakolu, na het ra serba zonê ma, serba qomê ma, jü gama de hewle estê, itha ra wanune, wes u war bo.

Dostê Delali....

No Antolojiyê mı de 21 welat ra 70 sairê namdari, nêjdiye 300 şiiri estê. Tey kamci sairo namdar çino ke! Mevlana ra bicêrimê... Nesimi, Ömer Hayyam, Furuğ Ferruhzad, Şirazi, Dante, Shakespeare, Hugo, Schiller, Goethe, Nietzsche, Lorca, Brecht, Neruda, Pavase, Morante, Kavafis u Ritsos, Durrell, Yeats, Hesse, Bachman, Puşkin, Ciğerxun, Cemal Sureya, Nâzım Hikmet, Külebi, hata be Ahmet Arif hona nêçê sairê namdari....

Jü ki no Antolojê mı de iyê ke emegê xo vêrdo ra, sıfte...

Mesut Keskin

Doç. Dr. Bülent Bilmez

Nustoğ u siyasetkar Ragıp Zarakolu

Enstituyê Zazaki ê Frankfurti

Ramazan Yıldız

Can u Cenk Astarey ki Almanki u İngiliz ki ra çarnaene de phoşti dê mı. Ni, pêro-piya wes u war bê, pir khal bê, serba phoṣtaria xo berxudar bê!

Zazaki bıwanê, weṣiya xo Zazaki de bıramê!

Berfin JÊLE

Adresa wastene:

BELGE Uluslararası Yayıncılık Cemal Nadir Sok. Büyük Milas Han No:26-28 D: 121-130 PK 34112 Cağaloğlu Yokuşu Cağaloğlu / İSTANBUL E-Mail: This email address is being protected from spambots. You need JavaScript enabled to view it.

PANDORA Kitabevi Katip Mustafa Çelebi Mh. İstiklal Caddesi, Büyükparmakkapı Sokak, No: 8/d Taksim / Beyoğlu, İstanbul, Türkiye Tel: (0212) 243 3503 veya (0850) 200 2206 Faks: (0212) 249 4757 e-Mail www.pandora.com.tr

KİTAPAMBARI www.kitapambari.com Adres: Hobyar Mah. Ankara Cad. Feyzi Bey Han No 43 Kat 2 / 3-4-5 Sirkeci Fatih İstanbul Tel: +90 212 527 9930 Tel: +90 212 519 2200 Fax: +90 212 527 9931 Email: This email address is being protected from spambots. You need JavaScript enabled to view it.

KİTAPPERVER Kore Şehitleri Cad. Aktuna İş merkezi No.55 K.5 İstanbul Tel: 0212 288 00 40 Tel: 0212 288 00 40 Fax: 0212 288 55 87 Email: This email address is being protected from spambots. You need JavaScript enabled to view it. KİTAPYURDU -- KİTAP VE KİTAP - DOST KİTAPEVİ -vbg....



 

 


Bınge: Berfin Jêle