Xeylê kayê ma yê serdê serı zi estê. Mesela koçeki kaykerdenı, govendı antenı, tiyatro kaykerdenı, xo meymun kerdenı, heşı biyayenı, herek u cınıştenı, cambazey kerdenı, cıni biyayenı, masqaralıxey kerdenı. teni u boyağa xo vırnayenı u herwına kay ameyê vıraştenı u kaykerdenı. Şewa serdê serı, xortan çınay cıni, veyv yan zi keynekan dayê xo ra, riyê xo teni yan zi boyaxa boya kerdê, tewre yan zi çıwali kerdê xo dest u keye bı keye geyrayê u çi arêdayê. Keye yo kı şiyê, mıhaqaq tey kayê vıraştê yan zi koçeki kay kaykerdê. Keyan ra en bolki çiyê êmışiyê werdi, pastêx, kesmey, sıncıxi, gozi, vami, nıhey pıraynayey, kılêncey, ıncilê wışki, perey u herwına arêkerdê. Kê weş rol vıraştê u koçeki kaykerdê, en bol çi arêdayê. Mesele, vanê şar bıdayê hüwatenı u wextê do weş bı inan a bıdayê ravêrdenı. Kê xo çımandê gırdandê keyan, yanê kal u piran vıstê, ey fekra çıwalê xo yan zi tewrey xo degrotê u tunıkê xo kerdê pırr.
Wexto kı newe şiyê keyeyê wına vatê u dest bı antenda govendandê xo yan zi kayandê xo kerdê,
"Serê serı, bınê serı
Pir qürbana kaldê serı.
Pirê werzı mahzenı kewı
Sandıq u cayê nımıtan têvdı
Çı çiyo weşo terwende esto
Bıgi, biya tewrandê makı.
Serı serı, bınê serı
Pirı qurbana kaldê serı
Pirê heyran çi ser kewı
Biya ma rê werdena serı
Têvdı külin u sandıqan
Cı ra vejı êmışanê şirınan".
Bı no hesaba keye bı keya, a şewı heta şewra doşbiyê u çi arêdayê. Jew jew keye dı vınderdê, tay çi werdê, çay,qahwe, şerbet, sıskı, xoşawı yan zi zewbi çi şımıtê. Taytaynan nanê şolıki, taynan nanê nebi, taynan nono hakın, taynan nano rıweni miyan dı surkerde, taynan qatmey u herwına zi dayê koçekandê xo yê serdê serı. Wexto kı koçekan werdo weş gırotê yan zi werdê, ey a tepeya kerdê xo burê. Cı rê vınderdış u solığ gırotenı çınêbi. Tay şêlıganê keyan zi wexto kı inan kay kaykerdê, ê zi inan dı kewtê govendı u bı inana piya kaykerdê.
