Ez sersera şardê ma, ê wendoğ u nuştoğan u ê heme alemdê cihani bımbarek kena. Ez posena serêda newêya bêlec, bêkıştenı, bêinkar heme şarandê dınyay rê biro u ma heme tey zey bırayana heyat bıramê. Serêda roşnayi, serêda serbestı u xoser şardê ma rê wazena. Posena kı şarê ma dı serda 2003 an dı xo hesiyo, jewbiyayena xo vırazo u qandê xo, qandê şareyda xo, qandê kameyda bıgırweyo. No dınya hemını rê qim u bes keno. Vanê cay şardê ma zi dı no alemdê dınyay dı vıraziyo u şarê ma zi zey şarandê dınyayê binan biro sınasnayenı u bı namedê xo ya namebodê, nekı namedê jewnaya. Heme şarandê bındestan rê serbestey u serkewteney wazena. Sera newê serêda weş u roşnayi bo heme alemdê dınyay rê.
Veri dı welat u dewandê ma şênayeyê serda newê, serdê serı vıraziyayê. Wedey merdımandê namdaran, zenginan, beg u ağleran fek ra biyê pır. Babet babet şamiyê terwendey vıraziyayê u ameyê werdenı. Labırê ewro zey veri a germey, a şênayey, a kêfweşey nêmenda. Demdê veri dı, xortê ma keye bı keye geyrayê, sersera gırdandê xo bımbarek kerdê u çi arêdayê. Her keyeyo kı şiyê, tey deyri kerdê, govendı gırêdayê u kay kerdê.
Wexto kı şiyê keyeyê una dêri kerdê u vatê:
Serê serı, bınê serı
Pir qürbana kaldê serı
Pirê werzı, werzı xoser
Dekewê kuwariyan ser
Êmışan arêkı pêser
Bıgi, lê biya ma ver
Lo kalo, kalo, kalo delalo
Akı tewrey perandê xo lo
Cıra vejı bıdı xeşlığê ma lo
Ma to rê bıkemı dıhay lo
HOMA emrê to derg kero
A dınidı cay to cenet bo
Lê pirê, lê heyran pirê
Emır bıkı veyvandê xo rê
Wa fekê küwariyan akerê
Kesme u sıncıxan biyarê
Tewranê ma pa pır kerê
Ma şıma rê dıhay bıkerê
Lê pirê, lê heyran pirê
Ka demetê pastêxi lê
Pirê dem no demo lê
Êmışi biya ma burê lê
Bê zeriya ma weş kı lê
Ma to rê dıhay bıkerê
Demo kı yan zi keyeyo kı çi werdi, êmış, çerez, perey u herwına ano dano xortan, o wext kêfê xortan beno weş. Serqefley xortan bı vengê do berza veng keno a embazandê xo u vano:
Xortêno hadrê ma hêlkerê
Govenda xo tiya dı sur kerê
Roj no rojo bêrê ma şên kerê
Lolıkanê xo têtewr bırıjnê
Banca dergan burê nerman
Ê kı şeqenê dest pa menê
Şên kerê xortêno şên kerê
Govenda xo ma sur kerê
Veng a luliyan ser finê
Luliyan vero xo bışanê
Govenda xo weş kerê
Keynan xo sero komkerê
Hadrê xortêno xo bışanê
Keynan xo sero komkerê
Çalım çalımi sero bıkerê
Zeriya keynan pa bıveşnê
Şewa şıma şewa şê bo
Bereket keydê şıma kewo
HOMA heruna cı pır kero
Mekanê şıma nurcenet bo…
Not: Manê dergan tiya dı sıncıxiyê, nermi zi kesmeyê, ê kı şeqenê zi goziyê.
”Banca dergan burê nerman
Ê kı şeqenê dest pa menê”
