EVE NAMÊ HAQİ MILET XAPITENE
Jüyê de mao Dêrsımız bi, bi vi ezaê partiyê Erbaqani, şiyêne camiye.
Mıleti cı ra vato „Tı ça sona camiye?!“
Vato „Ez son camiye, hama ez ke çêver de şüne, van ‘ya Hezreti Eli’, heni kun zerre.“
Vato „Xocê camiye ma rê qesey kerd, yoxro ke Hezreti Eli Haq viyo. Xoci va ke ‘Rozê Mıhemed pêxamberi pilav no ro ser, Haq ki dawete kerdo’, vato ‘bê pia pilav borime.’
Haqi vato ‘Tenê perda wertê ma de rafiye, ez yon.’
Mıhemedi perda fista ra, Haq amo, bınê perda ra destê hu ardo, ey ve Mıhrmedi ra ho rê pia pilav werdo. Mıhemedi nia do ke, bojiyê Haqi jê bojiyê Hz. Eli pırçıno. Mıhemedi ke pilav werdo, heva de pilavi gına ve bojiye Haqi ro. Dıma Hz. Eli ke amo, Mıhemedi nia do ke, eke a heva pilavi hawa bojiyê Hz. Eli rawa. Endi Mıhemedi zono ke Hz. Eli Haqo.“
CAMİYE
Zomonê valiyê Mamekiye Kenan Güven dewunê Mamekiye ra fetelino ke camü vırazo. Amo dewa ma, vato „Sıma rê camiye vırazon“. Dewızu qewıl nêkerdo, vato „Ma camiye nêwazeme, ma rê mektev vıraze, mektevê ma çino.“ Vali mektev vırazeno? U wazeno ke camiye vırazo.
Vali uza ra şiyo Gaxmud, inu ki camiye qewıl nêkerda, vali vato „Camiye ke vırazenê, ez sıma rê mektevê werti ki vırazon.“ Jü vato „Mekerê, va vırazo, çutıri bıvo, ma hora camiye nêsome. Camiye ke vıraste, ma rê mektev ki vırazeno. Tha verê çêverio, qe ke nê domonê ma endi Mamekiye nêsonê, tha horê wanenê.“
Vali camiye vırazeno, mektev nêvırazeno. Va ke „Zu xocê camiye ki tain kerdo, amo, dewızu vato ‘Rozê ke naê bırri bêrê, tu benê, kısenê, ma nêşkime tu bıxelesnime, ho rê su!’. Gos nêdo. Rozê naê bırri qelevinê de dewe, mordemeki benê, kısenê.“
İ vali rozê ki domoni kerdê top, vato „Bon dan mektev, va mılhey vê.“
Sağşêg ra mêrdê amıka mı lazê hu Temır berd Mamekiye de fist ra ve domonu, va ke „Şêro, va hetê hukmati ra horê bıwano.“
Domonê ke berdi, eke çı çetıniye diye, pêro remay, peyser amey, i lazê amıka mı rawa hu nêvete, bese nêkerd bêro. Tha ra şi, ard ke hu sas kerdo. Zomonê ke mend, ey hu est dare.
SEYTA’
(Mılet taê çi ki beno, besneno seytani ra)
Ez rozê Mamekiye de verê qewa de ronisteu, di-rê mordemi ki ververê mı de ronisteê, qesey kenê. Mordemê arave kuay vi hermetê ra, hermete merdi vi, qalê dae kenê.
U jü vano „Ey arave kuya ve a hermeta fıqariye ra, kıste.“
Ao ke lewe de, „Heya, raştia’ vano, „ey a fıqariye kıste.“
Jüyo de bino ke lewe de, u ki vano „Yaw ey heni nêkerdo, şeytani heni kerdo.“
İ vanê ke, „Seyta’ çıko, ey arave kuyo pa, kısta.“
U heni ke sond weno, heni ke sond weno, vano „Haq vo, pir vo, mordemeki ve hu mı rê qesey kerd, ey heni nêkerdo, ey va ke ‘Ez nat ra şiyu, gındelıka de şiae kote ve vırêndiya mı, seyta’, porrê hu şia u gınçkın vi. Kot vırêndiya mı, mı direksıyon na heti ser çarna, ey guret, du heti ser çarna, mı her ke na heti ser çarna, ey du heti ser çarna, berd, kuya ve cinıke ra.’ Ey ve hu mı rê qesey kerd, ey heni nêkerdo, seytani heni kerdo.“
İyê binu thoa veng nêkerd; ey rê inam kerd, inam nêkerd, nêzonon.
DISMENÊ HAQİ
Jüyê de maê Dêrsımıji mı rê nia qesey kerdi vi:
Rozê sahabey benê top, qesey kenê, vanê „Dısmenê her çi esto, eceva dısmenê Haqi ki esto?“ Vanê „Ala reê pêxamberi ra pers kerime.“
Sonê lewê Mıhemed pêxamberi, vanê „Hal - mezal nia, dısmenê her çi esto, thoa dısmenê Haqi ki esto?“
Vano „Esto.“
„Mevaze, mevaze“ vanê, „kamo?“
Vano „Aê ke sonê camiye, camiye de ke nımaz kerd, benê topi, zumıni xapnenê, dısmenê Haqi iyê.
