Çırtıka bıvêso daê, mı va, sal o kerre
ez aman Çırtıke daê, nêgırotan zerre
dılegê mı ke Heqi ra esto,
nêwerê emegê xuyê serre
sano sano sano sano
nao tariyo, sano
mın Dere qedıto Heqo, vırniya mı Gabano
veciyan Gabanê çê vêsay de daê,
mızo, hem dumano
tersê mı ke ez bımıri,
meztê mı wertê Abasan de bımano
wayê wayê, wayê wayê way lemınê wayê
ezo amane, veciyan, Heqo, Gabanê çê vêsay
sedaê gosê mı ro şiya, nêzan, koti ro veng day
va ke “bêkes Zeynel, çewres esparê Qırxleran resay”
bımbarekan amay, çar kosê mı ra nia day
jübini de dızdiya qesey kerdi, vati ke,
“thabaê nêbiyo, tenê nıngê xo vêsay”
bêkeso Zeynel anci ko de ca verday
mıno hewar kerdo, Heqo, Wiy, Doli Babay
kot çımanê mın ver daê, çhikê, wiy, pakay
mı çımê xo kerdi ya ke, veciyan diarê mezra vêsay
mı va “Heqo, comerdiya to sukur bo”
gerisê serê Dêrıke mı ra asay
Zımıqa bıvêso, çewres hêniyê Muzıri
Abasan kerda parti emser, Rocê Xızıri
tersê mıno ke ters bo,
koê vêsay de ewro ez bımıri
Gabano bıvêso daê, mı va sal o cerde
nınganê mın tabat mı ra bırrna, niştan ro
ezo refi ver de
bımbarek amo be ğezeb, tozıke dımneno
çım o buriyanê mın ser de
mı va “Xızıro Khal, mêrdina to ke esta,
ko de mın meverde!”
Gabano bıvêso daê, mı va ver semsêro
çê ra temey kerdê, Zeynel mefındero, bêro
dumanê Gabani bêkes Zeyneli bıcêro
feqiri rae sas kerda, nêzano, ko ra koti ra sêro
mı va, nalıka sure qırbana tüya
diwanê Uli Diwani de bıvêro
Qese u qeyde: Zeynelê Qeremani
Het: Xozat – Dêrıke
Nuştoğ: Asmêno Bêwayir
