Têmane (Göreş tepıştenı): Na hım kaya, hım müsabaqaya, hım qüwet tecrübekerdena, hım pê dı qerezkerdenı u xo pê dı cerıbnayena. Kay ra vêşêri kes şeno vajo qüwetê xo pê dı cerıbnayenı u pê dı müsabaqa kewtena.
Têmane en bol ki bı teşfiqdê gırdan u waştenda inan a beno. Piyê qeç (Doman) u xortan, qeç u lacanê xo pê dı danê Têmanekerdenı. Têmane meydanan dı vaş u çimenan sero yan zi cıl, doşeg, keçe u herwına çiyandê rakerdan u sero ronıştan sero kay beno kı, wexto kı pê fênê erd cayêdê cı niro cayê do wışk ro, nêtewo yan zi nêşıkiyo.
Ê kı temenê (Ümrê) cı zey pê yê, ê pê dı têmane gırêdanê, tepşenê. O kı yan zi ê kı qezenc kenê inan rê kışta gırdandê inan ra yan zi ravey amyayandê dew u sukan ra xelatı yena dayenı. (Ravey amyayey ê wexti, Şêx, Beg, Ağa, Mıxtar, Seyid, Pil u herwınay bi).
Ê kı temenê cı zey pê yo yan zi serê-dıseri pê ra gırd u werdiyê, inan ra dı merdımi pê rê vıjênê meydan. Meydan dı xo kerd hadıre tepey a, o kı inan rê hekemey (Hakemey) keno, o yeno ninan kontrol keno u çı şertan dı do pê dı têmane tepşê izah keno. Bahdê heme çi heta hirını amoreno u ninan dano têmane kerdenı. Ê ya tepey a ê pê tepşenê u dest bı têmani kenê. Têmanandê ma dı jew lıngı yan zi pay berzo jewi ver, yan zi cayêdê cı yê hasasi tepêşo nêbeno, meno, yasağo. O direk têmani vıni keno u teberdê kay dı maneno. Têmane dı vanê miyananê pê, qol u bınê qolandê pê, mıl u külemekanê pê tepêşê u pê berzê erd. Erdo zi vanê miyananê pê biyarê erd. Kê miyaneyê kê ard erd, o ê têmani qezenc keno. Tabi têmane kerdenı rê zi hekemi lazım ê. O kı hekemey keno vanê têmane tepıştenı ra fahm bıkero. Organêdê pê tepıştenı, pê kütkerdenı u cayêdê pê bı qasıt tewatenı meno. Vanê ê kı pê dı têmane tepşenê diqetê nê çiyan bıkerê.
Têmane kerdenı rê zi zanayenı, hüner, şeytaney, çapıkey, şit ey u qüwet lazım o. Wext esto jew do bol zayıf zi şeno jewdê zor bıqüweti dı têmane tepêşo u bı kayandê xo ya miyaneyê ey biyaro erd.
