Na kay zi kışta qeç, xort u resayan ra yena kaykerdenı. Bı hak, Gozı, Porteqal, Beluy, Güley u herwınaya yena kaykerdenı. Zımıstani şêlıg cayê dı yan zi wedeyê dı kom beno u na kay kaykenê. Şêlıg verê kaykerdenı xo rê cayê do duzo veracêr qandê na kay keno hadre. Ê kı do kay kerê şınê cordê ê cadê veracêriya, cora veracêr hakanê xo jew bı jew vıradanê, leyri kenê. O hak çend leyri bo u şıro duri, o kı kay keno, qandê ey hend rındo. Çımkı wexto kı şıro duri rew rewi hakê bini ninê u nêgüneno pıro.
Ê kı do na kay kaykerê pê pey dı benê rêz u kewnê nobetı. Jew hakê xo cora veracêr vıradano. Hakê ey leyri beno u veracêr şıno. O bin nişanê ê haki gêno u cora veracêr hakê xo vıradano. Bı no hesaba kaywani pê peya hakanê xo vıradanê. O kı nobetı ameya cı u hakê xo vıradano, hakê ey şıro hakdê kê ro güno, o ê hakê kı verê ey vıradeyayê ê hakan hemını gêno, (Weno, qezenc keno).
Mesela ma vajê şeş merdımi kay kenê, jew ê xo vıradano, o bin, o bin u bı no hesaba turê şeş hemını qedêno. No fın sere ra (jewi ra) dest peykenê, hakê xo yê dıdını vıradanê u heta ê şeşını yenê. (Tabi wexto kı hakê jewi hakdê jewi ro nêgüno, tım turanê xo domnenê, kaya xo ramenê hetan kı hakê jewi hakê ro güno). Wext beno hergı jew çıhar-panc haki vıradano, labırê hewna zi jew jewi ro nêgüneno u kes nêweno. Hetan kı hakê jewi jewi ro nêgüno a kay nêvıradanê. Wexto kı hakê jewi güna ê jewi ro, a kay vıradanê, no fın dest bı kayda dıdını kenê. Mesela heme günayena jew haki, jewna hakdê biniya. Güna pıro tepey a mesela qedêna, hemını gêno. (Eger bı hakana kay kenê ê hakan, eger porteqal yan zi çidê biniya kay kenê inan gênê).
Hak güna pıro u a kay qediyê tepeya, kayda dıdını dı o kı en sıfte hakê xo vırada bı, o no fın beno ê en peyni. Yanê hemenı dımı o hakê xo vıradano. Ê dıdını zi beno ê jewi. Bı no hesaba pê pey ra vırênê, tur erzenê u hakanê xo vıradanê.
Qandê kı cora veracêr vıradanê, nê leyri benê, leyri benê u bı roverdıka vera cêr şınê, ey ra namey na kay Roverdıkı neyaya pa. Gır benê, şınê u günenê pê ro u pê wenê. Na kay kayêda zahf weşa bı heyecana.
