Na kay bı pıstana sıloyan sero yan zi erdê kı hera cı welını, felhanını u nerma, tey pıst bı rehateya şıno war, ê cayan dı kaya pısti kay bena. Na kay en bol ki payızi u wexto kı varan (Yağer) vareno u erd beno nerm o wext kay bena. Şıma zanê payızi varan bol vareno u tım erd hi u nermo.
Qandê kaykerdenda na kay xort u resayey mêşe, dar u bardê xo miyan ra darê raştiyê kı zey çıwanayê cıkenê, bırnenê u anê serê cı roterenê, kenê tuj u qandê sertbiyayenı u nêşıkyayenı ê seri benê kenê welda germı miyan. Ê kı kenê na kay kay kerê hergı jew cemeyê, vırarê pısti gênê u şınê sıloyan ser yan zi cayo kı do tey pıst kaykerê ê cayan. (Tabi nê veri pê haydar kenê, do fılan rojı, fılan seatı dı, fılan ca dı kaya pıst kerdenı kay kerê).
Heme amey u resay pê tepey a dest bı kayda xo kenê. Na kay bı no şekla kay bena: Jew pıstê xo seredê tuj u nuy ser dano erd ro u ey erdo keno war. (Tabi payra pıstê xo serê ser dano erd ro. O kı nêzano pıstê cı erdo nêşıno war u kewno erd). O bin zi wıni eyar keno kı pıstê xo wertedê pıstê ey ro do, pıstê ey bıfino, erd ra bıqlayno u ê xo erdo war kero u ê ey buro. Wexto kı jew pıstê xo erd ro do u pıstê cı erdo nêşıro war, o bin pay ra pıstê xo dano wertedê kışta ê pıstê erd kewti ro u ey herunı ra luneno. (Vanê en kemi hendê nimkıştı herunı ra bılüwo u cay xo bıvırno). Wexto kı ê pıstê erdi herunı ra bıluno, yan zi wexto kı pay ra yo u pıstê xo pay ra dayo pıro, o pıst pay ra vısto u pıstê cı erdı şiyo war, ey weno. Tabi qandê werdenı, wazenê wa pay ra bo, wazenê wa erdo bo, vanê o kı pay ra pıstê xo dano pıro pıstê ey erdo şıro war u pay ra bımano. Jewbi nêşeno buro.
Wexto kı pay ra bıfino yan zi herunı ra bıluno u pıstê cı nêdenışiyo (erdo nêşıro war u pay ra nêmano), no fın jewna dest bı kay keno. O kı weno o tım kaya xo rameno, hetan kı pıstê ey nêdenışiyo yan zi nêşo ê bini buro. Nêşo buro yan zi pıstê cı nêdenışiyo, jewna dest bı kay keno.
O kı pıstan weno, ya wıja dı ê pıstan fına peydı bı perana roşeno ê kı cı ra berdê inan, yan zi hemını vırarı keno u ano keydê xo. Ê kı kaya pıstan kay kenê, wexto kı pıstê cı qedênê ya pê ra deyn kenê yan zi herinenê. Kaya pısti zi zey kayda xümariya kayêda nêweşa. Kes fınê bımıso cı u kêfçiyê cı bo rew rewi nêşeno vırado. Tabi na kay rê zi zanayenı u hüner lazımo.
