Na kay zi qeçkan miyan dı yena kaykerdenı. Qeçekê dewê yan zi ê mahla u taxê cayê dı arêbenê pêser u na kay kaykenê.
Na kay wına kay bena: Dı qeçeki, hergı jew serêdê lay tepşeno, hebê anceno, erd ra bırneno u keno raşt. Raşt kerd tepeya wırna piya ju kıştı ra u fınêra ê lay şanenê. Wexto kı şanenê la ge beno berz, ge beno nızm u erd ra şıno. Wexto kı şaneyêno, qeçekê yan zi tay qeçi piya xo erzenê werte u dı a şaneyenı dı, xo tıllo kenê, ê lay sera erzenê kı, o la cı lıngan bın ra ravêro u ciya nêkoyo u lıngandê ciya kıştê dı nêmano. Wexto kı jew nêşo xo wextê cı dı tıllo kero u xo layra ravêrno, la lıngandê ciya koyo u kıştêda cı dı bımano, o veşeno jewna yeno kewno herunı. Bı no hesaba qeçeki pê pey dı bı sıreyêna xo ê lay sera erzenê u na kay kaykenê. Layo kı xo sera erzenê vanê metin bo, wexto kı koyêno lıngana yan zi lıngan bın dı maneno rew-rewi nêvısiyo. Qandê coy layanê la eştenı ya qenab ra, ya purdê kendıri ra yan zi rês ra vırazenê. Na kay hewna zi dew u sukandê ma dı, en bol ki kışta qeçkandê werdêkan u keynekan ra yena kaykerdenı.
