Xort u resayey banan pey, dı rez u bostanan miyan dı, cıwênan sero, meydan u mergan miyan dı kom benê, qandê hirêlıng eştenı. Qandê kı hera (hard) nê cayan nerma u nê cay veng u duziyê. Qandê nermeyda a herı u vengeyda ê cayan, ê cayan dı arêbenê pêser. Qandê eştenda hirêlıngı cayê dı xetê ancenê u ay pey ra xo rê hirêlıngı erzenê, çekenê. Xetı ancenê kı kes hile nêkero u a xetı nêravêrno. Ê kı kenê hirê lıngı çekerê ê xeylê a xetı ra kewnê duri u fınê ra bı vazdayışa hetê a xeta yenê, lınga xo peydê a xetı dı ronanê u dest bı eştenda xo kenê. Labırê şerto, vanê kes a xetı nêravêrno u lınga xo xetı zere dı nêrono. Vanê tım lınga kesi teberdê a xetı dı bımano u wıni kes xo çekero.
Hirêlıngı wına çebena: Bı vazdayışa duridê a xetı ra yenê lınga xo ronanê a xetı ver u fınê ra xo holkenê u lınga xo ya raştı yan zi çepı hetê veriya erzenê. (Tay estê çepı ser xo erzenê tay estê raştı ser, kamci lıngı ser çekenê çekı ferq nêkeno). Eger ê raştı çekerda, a lınga cı koyêna erda nêkoyêna, fına a lıngı ser xo holkeno u no fın zi lınga xo ya çepı xover hetê verniya erzeno. Lınga çepı zi günena erd ro nêgünena, no fın a lıngı ser xo holkeno. Dı a holkerdenı dı hewara wırna lınganê xo resneno pê, keno jew u zey çıtmiya wırna lınganê xo pêya dıskıneno, zelıqneno u xo erzeno ravey dı lıngan sero dano erd ro u erdı denışêno. Cayo kı lıngê cı kewnê, hekem ê cay beli keno. Bahdê eştenda hemını, o kı en vêşi eşto o beno ê jewını. Na eştenda hirê lıngı dı, lınga en bahdoyênı zey çıtmi çebena. Eştenı u peymıtenı eyni ê çıtme eştena, ferqê mabên dı çıniyo.
