Na kay en bol ki qeç (doman) u xortan miyan dı kay bena. Xort yan zi qeçê mahlayê, ê taxê yan zi ê dewê dı meydanê dı arêbenê pêser. Ninan ra ê jewi çımanê cı bı dısmalêda siyaya yan zi çaputêna gırêdanê kı verê xo u kesi nêvino. Ê bini çorşmey ney kom benê u pey ra destê xo danê külemek u qenda ney ro, çuştıki ancenê pıra u cı ver remenê. No zi bı ê çımandê pıştana çorşmey xo ninan fetılneno kı tepêşo. O kı cı dest kewo, vanê bı dest vılênayena inan bıvlêno u bısınasno, o kı tepışto ka kam o, kam niyo. Wexto kı tepêşo u ey bısınasno ka kam o kam niyo, o wext çımanê xo akeno. Hetan kı nêsınasno nêşeno çımanê xo akero. Tay estê bı vılênayena, tay estê bı nefes gırotena, tay estê bı qısekerdenı u hüwateya enbazê xo yo kı tepışto sınasneno. Wexto kı nêsınasno ey dano qıseykerdenı, namey cırê amoreno, dano hüwatero u pa küşat keno kı bısınasno. O kı tepışto xo ra hetan kı ey nêsınasno ey xo dest ra nêvıradano.
Tepışt u sınasna tepey a no fın o çımanê xo akeno, o kı tepışto çım anê ey pêşenê, gırêdanê. Bı no hesab a na kay kaybena u ramena. Qandê kı çımi yenê pıştenı, namey na kay zi çımpıstıkı yan zi çımpıştenı neyayo pa.
