Mewlud veyvan dı, sınetkerdenı dı, qandê kesandê merdan, qandê xeyr u xeyrati, qandê dafkerdenda qeza u belayan, qandê Pêğemberan, qandê gırd u pirandê xo u her wına yeno wendenı. Wexto kı qeçek Homa dana, wexto kı qeza u bela jewi sera ravêreno u daf beno ya qandê coy sedeqe deyêno yan zi mewlud yeno wendenı. Sedeqe qandê qeza u belayan, qandê verni gırotenda afet u felaketan, qandê oğır akerdenı, duri vıstenda şeytani u her wına yeno dayenı. Sedeqe deyêno merdımandê mıhtacan, neçar u sêküran, bêkes u bêpiyan u herwına. Sedeqe deyêno merdımandê kütırıman, kal u pirandê bêkesan, merdımandê topal u seqetan, bêlıng u bêdestan, kor u hafızan u herwına. Mewlud u sedeqana pê kenê temam. Tabi sedeqe dayenı zi babet babeta bena yan zi deyêna. Tay perey danê, tay nan u şami danê, tay tene u werd danê, tay çına danê u herwına. Tay estê kı hergı şewra sedeqe danê kı qeda u belay, qeza u felaketi cı ser dahf bê u cı ra duri kewê.