Sirık rıjnayenı (Nebi, Mısri): Nebi lemda xo sero sirıki tepışti u ê sirıki kerdi biyayey u amey wextê çinayenı, inan hemını çinenê kenê çıwalan u anê bani sero, ortman sero tiji vera çend rozi rafinenê, qandê wışkbiyayenı. Rınd wışk kerdi tepey a, cayê do dawıte dı, wedeyê dı yan zi cayo kı cıwên tey çarnenê ê cayan dı, yan zi cılandê bol kıhanan sero ê sirıkan roşanenê. Sirık roşanayenı yan zi nebi sirık ra rıjnayenı wına bena, tay bı destandê xo ya ey pıroşnenê, sirık u lemanê cı cê ra abırnenê. Tay zi ê sirıkan cayê dı pê sero ronanê, çıwanê zey mısasan kenê xo dest u bı ê çıwana danê ê sirıkan ro. Bı no hesaba nebi ê sirıkan ra rıjnenê, pıroşnenê u cê ra vejenê. Eger sirık u hebanê cı pê ra niyabırnê ca nêkerê nêşenê ê nebi berê bıtahnê u biyarê burê. Yanê akerdeyê cı sirık u hebanê cı pê ra abırnenê. Hebê cı qandê werdenda insanan, sirık u purê cı zi qandê werdenda dewar u çarwan benê kenê zere u merekan.
Wexto kı nê kari kenê, yanê sirıkan bı desta pıroşnenê, heme cayê dı yan zi keyeyê dı yenê pêser, cılan xo vero rakenê, çorşmey ey roverdıkı gırêdanê roşenê u xo ver dı pıroşnenê, rıjnenê xover ê cılan ser. Tabi heme dewızi piya nê kari kenê. Verênanê ma vatı: "Çıçi jew desti esto, vengê dı destan esto". Heme piya kenê kı hım rew bıqedinê u hım zi têmıyan dı xo rê burê, bışımê, kêf u şahi bıkerê. Qandê kêf u şahiyan zi namey ney veyvey sirık rıjnayenı yan zi pıroşnayenı neyayo pa. Tabi nê kari en bolki wextê xo yê vengan dı, şewı wede u keyan dı kenê.
Wexto kı nê kari kenê ê kı vengê cı weşo dêri kenê, ê kı estanıki zanê estanıki vanê, ê kı zewbi hünerê cı estê yanê luli, saz u çiyo wıni cınenê, ê kı zanê koçeki kay kerê werzenê wertedê ê şêlıgi dı koçeki kaykenê. Mabên dı zi çay u qahwanê xo şımenê, çerezanê xo çerez kenê u werdena xo wenê. Tabi çina esto, nê kari dı ne ecele u ne zi lez kenê, çımkı çıwext bıbo beno. Zey pali u cıwênan ha-ha nêkenê u rıhanê ê şêlıgi nêgênê. Ê pali u cıwênan varanê (Yaxerê) bıvaro hemi telef keno u pede beno, qandê coy ecele kenê kı rojê ravey bıqedinê u biyarê zere kerê. Ê sirık rıjnayenı, qandê qedinayenı, ganê xo nêvejenê u xo nêtewnenê.
Wexto kı ê keyeyê qedinenê, ey a tepey a dest bı ê keyena kenê. Bı no hesaba keye-keye sirıkan rıjnenê, pıroşnenê u pê ra abırnenê. Wexto kı benê ayre dı tahnenê, eger ê jewi hewna nêqediyayo, ê bini ra deyn keno u beno ayre dı tahneno. Wexto kı ê xo pıroşna ê deynê xo dano. Ê kı a serı nebi cı niyameyo yan zi nêkarıto, ê zi ya xo rê herinenê yan zi qandê dayenda serda binı xo rê dost, merdım u enbıryanan ra deyn kenê. Ma hetı nanê nebi, kılorê nandê nebi, kılêncey nandê nebi u rıweni miyan dı surkerdena nandê nebi bol vırazêna. Yanê ma bol nanê nebi wenê.
Bı no hesaba hım karê xo kenê u hım zi kêfkerdenandê xo ra ca nêmanenê.
