Germia İmamu (Aşure)

Rocê imamu sabıt niyo. Bayramê qurbani (roşanê beraqan) ra 20 roce tepia rocê imamu cêrino. Serre be serre ravê sono.

 

Potena germia imamu rê gereke 12 thami (yemisê ke kunê cı) temam bê. Nê thami kunê cı:

 

  1. dendıkê gozu
  2. eskıci (sıkıci)
  3. sae (teze ya ki husk (thalasey/qaxê sae))
  4. muriye (ya ki qaxi)
  5. fındıqi
  6. tüy
  7. bosmozey (basmeci, çiri, herıgê (mışmışê) huskkerdey)
  8. vami
  9. xurmey
  10. incıri
  11. fıstıqi
  12. seker u sole

 

Taê sıt, taê ki lovazanê (lobiyanê) husku, nuku kenê cı, hama hetê ma de cı nêkenê.

 

 

Ağwa  (awa) germi nana re ser gırina, germia dene (gendime) pak şünê, kenê cı, gırinê. Thamu pak şünê, kenê qabê de bini, cia gırênenê. Ağwa şiae (awa verêne) verdanê de, ağwa serdıne kenê ser, reyna şünê, kenê wertê germi. Ni pia kelê, dı keli yenê ra ser, tenê pia gırinê. Deva devo (thamê ke poti) ke adır sera nanê ro, a rae seker (serbet/sarvet) kenê cı. Eke germi hest amê, qabo de bin de seker be ağwe gırênenê, kenê wertê germi. O ra tepia bena serdıne, wenê.

 

*Germia dene: heb benê dıng (soqi), kenê ro, ağwe sanenê pıro. Dest ra finê werê, têv danê. Qafıkê hebi sera sono, zerrê xuyo sıpê maneno. A germi vicenê ro, vay de vay danê, o ra tepia kenê husk.

 

Vatoğe: maa mı, Çêna Xatune be Memed Ağaê Miyandonıke ra (Derê Sanse, Mazra Sıêmanu, Pılemoriye-Dêsım) Miyasa

Nuştoğ: Mesut Asmên Keskin

© www.zazaki.de (Asmêno Bêwayir & Hesenê Reqasa) E-Mail: keywa@zazaki.de
Layout: Umut Akkoç

Please publish modules in offcanvas position.